【支持膀胱癌患者】
膀胱癌，對你嚟講，係咪好遙遠？你又想唔想像得到，一旦因爲膀胱癌而切除咗膀胱，又會點樣影響生活呢？
每年約有400宗膀胱癌新症，數字喺過去幾年有緩緩上升嘅趨勢。患者會出現小便帶血、小便時灼熱、尿意頻繁等病徵。因為病徵比較難察覺，有機會拖延咗診治。
要治療膀胱癌，有啲患者需要將整個膀胱切除，仲要連接俗稱嘅「尿袋」。好多患者會因為孭「尿袋」所帶嚟嘅唔方便而唔想外出，情願日日留喺屋企，無晒社交生活，情緒因而大受困擾。
其實，今時今日，膀胱癌嘅治療已有所進步，例如有新嘅膀胱重建手術，合適嘅患者無需再孭「尿袋」。除此之外，對於治療晚期膀胱癌，亦有新一代嘅PD-L1免疫治療，相對傳統嘅化療藥物，可以有效咁延長療效，同時亦可以減少治療時嘅副作用，改善患者嘅生活質素，令佢哋可以重新享受戶外生活。
我響應香港泌尿腫瘤科學會，陪膀胱癌患者走出戶外，走向新希望。
想更了解膀胱癌，請看： http://www.hksuo.org/膀胱癌
#香港泌尿腫瘤科學會 #膀胱癌 #膀胱重建 #免疫治療 #走出戶外走向新希望
Search